Mübariz Nağıyev

Heç vaxt sadə olmamışam, sadəliyə də can atmamışam. Məncə, nə qədər mürəkkəbsənsə, o qədər də maraqlısan, qiymətlisən.
Hərdən mənə elə gəlir ki, dünyanın yaranışından varam, sonuna qədər də var olacağam. Yox, allahlıq iddiasında deyiləm. Bilirsiniz, yaradıcı adamı başqalarından fərqləndirən nədir? Biz təzadlı, bir-birinə əks şeylərə inanırıq. Biz eyni zamanda həm yaradana, həm də onun yoxluğuna inana bilirik. Yoxsa özümüz heç nə yarada bilmərik.
Dünyada hər şeyin izahı var, bircə insanın daxilindən, onun məğzindən başqa... Bu məğzi altıncı, yeddinci, səkkizinci hisslərlə duymaq mümkündür, gözünlə yox, daxilən nəyləsə, bəlkə əgər sadəcə nasos deyilsə, ürəyinlə görə bilərsən...
Ruhunla - məncə, ən doğrusu budur! Bir şeyi izah edə bilməyəndə həmişə bu naməlum atributa istinad edirik.
Siz də mənə belə baxın. Gözünüzlə yox. Ruhunuzla...